Maxaa Kaa Hortaagan Noqoshada Qofkii Aad Rabtay Inaad Noqoto?

Nolosha qof kasta waxay ku bilaabataa riyo, rajayn, iyo damac uu doonayo in uu gaaro. Laakiin su’aasha ugu weyn ee hortaagan badanaa dadka waa: maxaa iga hortaagan inaan noqdo qofkii aan rabay inaan noqdo?
Marka aad si qoto dheer u fiiriso, waxaad ogaan doontaa in inta badan caqabadaha nolosha aysan ahayn kuwo ka imanaya dibadda, balse ay yihiin kuwo gudaha ka dhashay  sida cabsi, fikir xun, iyo kalsooni la’aan.

1. Cabsida Isbeddelka 

Mid ka mid ah sababaha ugu waaweyn ee qofka ka hor istaaga horumar iyo guul waa cabsida isbeddelka. Dad badan waxay ka baqaan in ay bilaabaan wax cusub sababtoo ah ma hubaan natiijada. Laakiin runta ayaa ah, qof kasta oo nolosha wax uun kusoo kordhiyay wuxuu wajahay cabsi, haddana taasi kama hor istaagin  inuu horay u socdo.
Haddii aad rabto nolol wanaagsan ama guul dhab ah, waa inaad barataa in aad ku kalsoonaato safarka, xitaa markaad arki weydo halka uu ku dambeyn doono.

Cabsidu waa caqabad qarsoon oo dadka badanaa joojisa. Waxay kaa dhigtaa mid ka cabsada in aad guuldarraysato, in lagu diido, ama lagu dhaleeceeyo. Laakiin haddii aad fahanto in guuldarradu ay tahay qayb ka mid ah barashada, waxaad bilaabaysaa inaad ku noolaato si kalsooni leh islamarkaana aad badsato guuldarada maadaama ay iyada laftigeedu tahay furaha guusha.

2. Fikirka aan wanaagsanayn

Fikirka aan wanaagsanayni waa sida daruur madow oo daboolaysa maskaxda. Haddii aad mar walba isku aragto sida “anigu ma awoodi karo,” “dadka kale way iga fiican yihiin,” ama “nasiib ma lihi,” waxaad si tartiib ah u dhisaysaa derbi kaa hor istaagaya guusha, waxaadna naftaada ku hogaaminaysaa meel aysan si dhibyar, si dhakhso ah uuga soo laaban doonin.

Maskaxda bini’aadamka waa aalad awood badan; waxaad u sheegto ayay rumaysaa. Haddii aad ku celceliso fikrado wanaagsan sida “waan awoodaa,” “waan istaahilahaa guul,” iyo “waan noqon karaa qof wanaagsan,” waxaad arki doontaa isbeddel muuqda.

 Si aad u noqoto qofka aad rabto inaad noqoto, waa inaad bilowdaa inaad is badasho maskax ahaan. Horumar kastaa wuxuu ka bilowdaa hami lagu daray fikir lagu daray qorshe lagu daray ficil lagu daray joogtayn.

3. Ku Noqoshada Dhibkii Hore

Dadka qaar waxaa celinaya xusuusta iyo dhaawacyadii hore. Waxaa laga yaabaa inaad hore u fashilantay, ama qof ku yidhi “adigu ma gaadhi kartid halkaas.” Laakiin ma waxaad ogtahay in nolosha cusub aysan imaan doonin ilaa aad ka sii daysid maskaxda noloshii hore?
Qofka guuleystay ma aha mid aan dhib arag, balse waa mid ka bartay cashar kasta oo ka dhashay guuldarro kasta.

Haddii aad rabto in aad gaadho guul, farxad, iyo isbedel, baro si xeeladaysan sida aad uga bixi karto meelaha dhaawaca leh. Maskaxdaada yaysan noqon xabsi kuu diida xorriyadda fikirka iyo riyada.

4. Kalsooni La’aanta Nafta

Qofka aan isku kalsooneyni si fudud ayuu u niyad jabaa. Mar walba wuxuu sugaa cid kale oo u xaqiijisa in uu fiican yahay. Laakiin runta waa sidaan kalsoonida dhabta ah waa inaad naftaada gudaheeda ka dhistaa.
Haddii aad rabto inaad noqoto qof muhiim ah, bilow inaad naftaada aaminsanaato. Qof kasta oo nolosha wax ka beddelay wuxuu lahaa hal sifo oo muhiim ah  waana kalsooni nafeed taas oo gaadhsiisay nolol barwaaqo ah.

Marka aad kalsooni yeelato, waxaad bilaabaysaa inaad aragto fursadaha halkii aad ka arki lahayd caqabadaha. Kalsoonidu waa furaha nolosha wanaagsan iyo horumarka joogtada ah.

5. Nidaam iyo Maamul xumo dhanka Waqtiga ah

Qaar kale waxaa ka hortaagan riyooyinkooda sababtoo ah ma leh qorshe iyo nidaam. Haddii aadan garanayn halka aad u socoto, meelna ma gaadhi doontid, wado walba ayaana noqon karta marinkaaga.
Shalay ayay ahayd maalintii ugu fiicnayd laakiin haday kusoo dhaaftay maanta ayaa ah waqtiga ugu fiican ee kale ee aad uqorsheyn karto riyadaada. Qor hadafkaaga, samee jadwal maalinle ah, kana dhig ficil. Dadka guuleysta ma sugaan “maalin wanaagsan”  way sameeyaan.

Marka aad qorshe leedahay, waxaad dareemaysaa jihayn iyo ujeeddo. Nolosha qorsheysan waa nolosha guuleysata.

6. Isbar-bardhigga Naftaada iyo Dadka Kale

Caqabada kale oo dadka badanaa haysata waa in ay is bar-bar dhigayaan dadka kale. Waxay is barbar dhigaan dadka kale waxay haystaan, waxayna dareemaan in aysan gaadhin heerkii dadkaasoo kale. Laakiin qof kasta wuxuu leeyahay waqtigiisa, waddadiisa, safarkiisa iyo dadaalkiisa.

Markaad naftaada barbar dhigto dadka kale, waxaad luminaysaa xoogaaga iyo diiraddaada. Halkii aad dadka kale ka fiirin lahayd, waxaad kaliya fiirisaa naftaada. Hadiiba aad is bar-bardhig samaynayso waxaad isbar-bardhigtaa qofkii aad ahayd shalay iyo qofka aad maanta tahaya amam rabto inaad noqoto.  Waxaadna markasta isweydiisaa “maanta ma ka wanaagsanahay sidii aan shalay ahaa?”

7. Cidna Ma Beddeli Karto Noloshaada Adiga Mooyaane

Qodobka ugu dambeeya ee ugu muhiimsan waa in aad fahamto in cid kale aysan kuu samayn karin guul ama farxad. Adiga ayaa ah shaqsiga noloshaada maamula waana in aad qaadataa masuuliyada noloshaada 100% hadiiba ay horay usocon iyo hadii kale adiga ayaa ka masuul ah.

RABBI(swt) wuxuu ku siiyay awood, maskax, iyo fursado badan. Waana adiga shaqsiga go’aa-ka ka gaadha sida aad u isticmaasho. Marka aad barato in noloshaadu ay ku jirto gacantaada, waxaad joojinaysaa cabashada, eeda iyo cudur-daarka waxaadna si toos ah u bilaabaysaa ficil dhab ah.

Gunaanad

Walaalkay ama walaashay, noloshu ma sugayso qofka qofkale sugaya ama diyaar garoobaya  balse waxay la socotaa qofka talaabo qaada. Haddii aad rabto inaad noqoto qofka aad riyada ku aragto, waa inaad maanta go’aansataa inaad bilowdo.  Jooji cabashada, jooji eedaha, jooji sugitaanka, jooji fikirka xun. Naftaada baro, ku kalsoonow, qorshee, oo u dhaqaaq jihada saxda ah.

Ha oggolaanin cabsi, fikirada aan wanaagsanayn, ama duruufo dibadda ah inay kaa hor istaagaan riyadaada. Xasuusnow  qofka kaa celinaya inaad noqoto qofka aad rabto, waa adiga laftaada.
Markaad fahanto taas, noloshaadu waxay bilaabaysaa isbeddel dhab ah ha dheeraato ha dhawaato waxaad noqon doontaa qofkii aad waligaaba rabtay inaad noqoto

W/q Khadar