Wali ma waxaad sugaysaa imaanshaha Maalin wanaagsan?

Ha Sugin Maalin Wanaagsan, ee Adiga Samee Maalintaas

Mararka qaar waxaan sugnaa in maalin wanaagsan ay si kedis ah inoogu timaado, sida in dunidu isbedesho, nasiibku nala soo safto, ama qof kale uu inoo yimaado si uu inoo farxad galiyo. Laakiin runta dhabta ee qadhaadh ayaa ah in  maalin wanaagsan aysan waligeed inoo imaan doonin ilaa inaan inaga ka samaysano ma ahane. Fursadahana waxaa ka faa’iidaysta kaliya qofka u diyaarsan.

Gaadhida Maalinta Wanaagsan Waa Go’aan ee Ma’ahan Nasiib

Dad badan ayaa ku fakara in maalinta wanaagsan ay ku xirantahay duruufaha sida haddii Abtigay i fahmi lahaa, hadii adeerkay uu noqon lahaa mid naxariis leh, hadii roobku da’i lahaa, hadii aan joogi lahaa wadamada fursadaha, ama haddii aan lacag heli lahaa. Laakiin kuwa nolosha horay uga socday waxay fahmeen sir muhiim ah taas oo ka dhigtay waxa ay maanta yihiin si lamida guulaha ay ka gaadheen noloshaan aduunyo waana: “waan dooran karnaa inaan faraxno, ku raaxaysano nolosha xitaa marka wax walba aysan fiicnayn”. waana sababta qormadaan aan u qorayo in qofkasta uu u baahan yahay in uu fahmo xeeladaan maadaama hadiiba uu dhib jiro qofka kaliya ee xalin karaa uu isla adiga yahay idamka EEBE.

Farxadda iyo guusha ma aha wax la sugo ee waa wax la abuurto. Sida ubax aan biyo helin u engego sidaasoo oo kale maskax aan fikir wanaagsan lahayn, xubno aan ficil qorshaysan lahayni ma dhalin karaan maalmo wanaagsan.

Markaad subaxda toosto, waxaad haysataa laba doorasho oo aan mid sadexaad lahayn waana

• inaad diiradda saarto waxa kaa maqan, ama
• waxa aad haysato.

Qofka dooranaya in uu diirada saaro waxa uu haysto islamarkaana qorshe iyo ficil ku dara waxa uusan shaki ku jirin in uu si toos ah u dhisayo maalintiisa wanaagsan.

Fikradda Maskaxda Togan

Maskaxda bini’aadamka waa aalad awood leh. Wax kasta oo aad diiradda saarto wuu koraa. Haddii aad diiradda saarto dhibka, ama dhinica aan wanaagsanayn markasta noloshaada waxay noqonaysaa mid dhib badan. Dhinaca kale Haddii aad diiradda saarto dhinacyada wan-wanaagsan iyo fursadaha, waxaad bilaabaysaa inaad aragto dariiqa horumarka iyo wanaaga maalmaha.

Maalin wanaagsan waxay ka bilaabataa hal fikir oo togan. Tusaale ahaan, halkii aad ka oran lahayd “maalin adag ayaa hadana i sugaysa maanta markale,” waxaad ku badashaa ama aad dhihi kartaa “maalin cusub oo fursado leh ayaa i sugaysa., maanta waa maalinkaygii”

Isbeddel yar oo fikir ah ayaa si weyn u beddeli kara niyaddaada, dhaqankaaga, iyo sida dadka kale kuu arkaan.

Tusaaleyaal Dhab ah

1. Isbadalkii Ayaan

Ayaan waa gabar shaqo yar ka haysay meherad ku taala magaalada Jijiga. Maalin walba waxay ka caban jirtay shaqada iyada oo dhahaysa way dhib badan tahay, lacagta iyo faa’iidada aan ku qabaana waa yar tahay.
Maalin maal maha kamid ah ayay ka daashay cabashada waxa ayna go’aansatay in aysan sugin in ay xaaladeedu  iska bedelayso.  Waxay bilowday in subax kasta ay qorto saddex shay oo ay ku faraxsan tahay, iyo hal yool oo ay rabto in maalintaas ay qabato.

Toddobaad uun kadib, waxay dareentay isbedel weyn. Maalinteeda waxay noqotay mid firfircoon, dadkii agteeda joogayna waxay bilaabeen inay dareemaan isbadalka balaadhan ee ku dhacay Ayaan.
Waxay baratay cashar weyn taas oo ah in aysan ahayn nolosha oo isbedesha, ee ay tahay  sida aad u aragto adigu.

2. Ganacsiga Axmed 

Axmed waa wiil dhalinyaro ah wuxuu inbadan sugi jiray in maalin wanaagsan ay u timaado isaga oo waayaha aduunka ee qadhaadh kaga dhuuman jiray in mar uun uu aado doono wadanka dibadiisa si uu fursad iyo maalmo wanaagsan uugu tago, ama in uu fursado dhaqaale uu kaheli doono wadankiisa, ama in uu helo doono lacag badan oo nasiib ah.  Laakiin wakhti kadib wuxuu is arkay isaga oo wakhti badan ku dhaafay sugitaanka maalin wanaagsan oo u timaada.

Axmed ugu dambeyn, wuxuu go’aansaday inuu bilaabo ganacsi isaga oo ku bilaabaya wixii uu hayo, kana bilaabaya meesha uu joogo kuna bilaabaya waxa uu yaqaano.  Wuxuu qoray qorshe yar oo maalinle ah, sida:

• Subax kasta inuu 30 daqiiqo akhriyo wax ku saabsan ganacsiga.

• Galabtii inuu la kulmo hal qof oo ganacsade ah si uu wax u waydiiyo islamarkaana aqoon uuga korarsado

• Habeenkii inuu qiimeeyo wixii uu qabtay.

Laba bilood kadib, Axmed wuxuu bilaabay ganacsigiisii yaraa, wuxuuna ogaaday in “Maalin wanaagsan” aysan ahayn mid la sugo ee ay tahay mid aad adigu abuurto adiga oo tallaabo qorshaysan horay u qaadaya islamarkaana iskasoo xidhaya albaabada cabashooyinka iyo sugitaanka.

Qorshee Maalinta Wanaagsani 

Haddii aad rabto maalin wanaagsan, qorshee.

• Qor waxa aad rabto inaad qabato.

• Ku bilow fikrado togan.

• Ha sugin dareen ee adigu abuuro.

Markaad qorshe leedahay, waxaad dareemaysaa didaam iyo jihayn. Taasina waxay si toos ah u dhalisaa tamar wanaagsan. Qofka aan qorshe lahayn wuxuu u nugul yahay jahawareer, halka qofka qorshe leh uu ogyahay meel uu u socdo si lamid ah meesha uu kasocdo.

Dhiirigelinta Nolosha

Dhiirigelinta nolosha maaha wax aan la taaban karin. Waa awood gudaha ah oo kugu riixda inaad u kacdo riyadaada, xitaa marka xaaladdu adag tahay.

Marka aad barato inaad adiga samayso maalintaada wanaagsan, waxaad bilowdaa inaad noqoto qof aan ka baqin nolosha.

Maalin wanaagsan waa marka aad fahamto in dhibaato kasta ay leedahay fursad, iyo in guushu ay timaado marka aad go’aansato inaad maanta bilowdo, adiga oo aan sugin berri islamarkaana aan isku halaynin qof kale qofkuu dooni ha ahaado.

Fariinta Dhabta Ah

Dhabta nolosha ayaa ah: dunidu mar walba ma noqon doonto mid kaa farxinaysa, laakiin adiga ayaa awood u leh inaad ku faraxsanaato dunidaada. maalinta farxada ah waa farxad maalinta kalena waxaad ogtahay in aad ka bixi doontid adiga oo naftaada ku kalsoon isla iyada uuna ay kaa saari karto idamka RABBI

Ma jiro qof kale oo kuu sameyn kara maalintaada wanaagsan sida aad adigu u sameyn karto.

Marka aad subaxda kacdo, ha sugin in qof kale kuu keeno farxad, ama xaalad gaar ahi ay kuu abuurto dhiirigelin. Ka bilow gudahaaga. Samee niyad wanaagsan, samee ficil wanaagsan, samee maalin wanaagsan.

Gunaanad

Walaalkaygii ama Walaashaydii waligaa ha Sugin Maalin Wanaagsan, Adiga Samayso Maalintaas muhiim ma aha inta wakhti ah ee ay qaadanayso  laakiin waxaa muhiim ah inaad hayso wadadii. Waa xasuusin muhiim ah in nolosha wanaagsan aysan ku imaanin sugitaan, balse ay ku timaado ficil, fikir, iyo go’aan.

Waxaad ogaataa hadiiba aad go’aansato in aad hesho wax aadan haysanin amarkaa waa in aad u diyaar tahay in aad waayi karto waxa aad hada haysato.

Markaad barato inaad adiga u xilsaaran tahay noloshaada, waxaad bilowdaa inaad noqoto qof guuleysta, dhiirigeliya dadka kale, una abuura maalmo qiimo leh.

Hadiiba uu dhib jiro maantay waxaad ogaataa in ay naftaada u baahan tahay in la badbaadiyo, laga badbaadiyo isla iyada oo ah naftaada, cida kali ah ee badbaadin kartana ay tahay isla iyada uun idamka RABBI.

Hadaba hadaad halkaan soo gaadhay su’aashaan hoose jawaabteeda inoogu reeb qaybta faalada

Ma sugi doontaa maalinta wanaagsan, mise adiga ayaa samayn doona?

W/q Khader