4 Arrimood Oo Hoos U Dhigta Kalsoonidaada

Kalsoonida naftu ama in aad ku kalsoonaato naftaada waa furaha guushaada, horumarkaaga waxayna kuu horseeda nolol farxad leh.

Laakiin mararka qaar, dad badan ayaa dareema kalsooni la’aan, taas oo ka dhalata arrimo qarsoon oo noloshooda saamaynaya. Halkan waxaan ku faahfaahin doonaa 4 arrimood oo hoos u dhiga kalsoonidaada iyo Sababta. 

1. Isbar-bar dhig Joogto Ah

Isbar-bar dhigga joogtada ah waa mid ka mid ah sababaha ugu weyn ee hoos u dhigta kalsoonida nafta. Marka aad isku barbar dhigto noloshaada dadka kale haddii ay tahay guulahooda, xirfadooda, muuqaalka ama lacagtooda iyo hantida, waxaad bilaabeysaa inaad iska ilowdo qiimahaaga dhabta ah.

Dad badan oo raadinaya horumar iyo guul ayaa si joogto ah u eegaya dadka kale ee ka sareeya, iyagoo isweydiinaya: “Maxay ku guuleysteen anigana aanan u gaadhin?” Ama “Ma waxaan ahay qof liita maadaama aanan sidaadoo kale sameyn?” Su’aalahan waxay kordhiyaan shakiga nafta waxayna hoos u dhigaan kalsoonidaada.

Si looga baxo arrintan, waxaad u baahan tahay inaad fahamto in kalsoonidaadu ka timaado gudahaaga, ee aanay ka imaan dad kale. Qof walba wuxuu leeyahay jidkiisa si lamid ah wuxuu leeyahay wakhtigiisa, waana muhiim inaad ku faraxdo guulahaaga, xitaa haddii ay yar yihiin.

Xalka:

Waxaad diirada saartaa kaliya naftaada oo hadiiba aad isbar-bardhig samaynayso waxaad isbar-bardhigtaa naftaada Shalay iyo maanta. Waxaad ku dadaashaa inaad maalinkasta oo ku Soo martaa ay ka fiicnaato midii kahoraysay. Sidaas hadaad samayso waxaad is arki adiga oo gaadhay guulo waawayn.

2. Jabinta Balanta Aad Naftaada Lagasho

Mid ka mid ah arrimaha qarsoon ee kalsoonida hoos u dhiga waa jabinta ballanta aad naftaada la gashay. Dad badan ayaa naftooda lagala ballan-qaad joogto ah sida in wax ay samayn doonaan ama ay wax kale iska dayn doonaan iyagoo dhaha “Berri ayaan bilaabayaa,” “Isbuucan waan dadaali doonaa,” “Sanadkan waan isbeddeli doonaa.” Laakiin marka balamahaas ay jabaan, waxaa soo baxaya ama abuurmaya dareen guuldarro iyo shaki nafeed, taas oo qofka u dareeni doono kalsooni daro wayn.

Balamaha aad la gashay naftaada oo aad  jebiso waxay ka dhigan tahay inaad naftaada u sheegto in aanad wax qabsan karin, taas oo si toos ah hoos ugu dhigta kalsoonidaada. Xitaa haddii aysan dad kale ogeyn, naftaadu waxay dareemaysaa ceeb iyo fashil wayn.

Xalka:

Si aad xal joogta ah ugu hesho arintaan waxaad samaysaa  ballamo yar-yar oo macquul ah oo aad gaadhi karto islamarkaana aad kalsooni ku abuuri karto. Ha isku dayin inaad hal maalin ku dhammeystirto wax weyn oo aadan ku dhamayn karin.

Tusaale ahaan waxaad balan kula gashaa naftaada in aad 2 liter oo biyo ah cabi doonto maanta. Halkii aad balanta ka dhigi lahayd in aad soonto Isniinta iyo khamiista adiga oo soonka Ramadan uun kaliya sooma waa kugu adkaanaysaa markaad jabisana dareenkii xumaa ee kalsooni darada ayaad galaysaa.

Markaa u qaybi hawlaha si yaryar oo tartiib ah u dhammaystir. Tani waxay dhisaysaa kalsoonidaada waxayna ka ilaalisaa hoos u dhigid.

3. La Noolaanshaha Guuldarooyinkii iyo Khaladaadkii Hore

Guuldarooyinkii iyo khaladaadkii hore waa casharro iyo khibrado, ee ma ahan culeysyo joogto ah. Dad badan ayay hoos u dhigta kalsoonidooda sababtoo ah waxay dib u xasuustaan fashiladii hore.

Waxay ka fikiraan khaladaadkii, guuldarrooyinkii, ama go’aamadii khaldanaa ee ay hore u qaateen, taas oo ka dhigaysa inay dareemaan inaysan waxba ka qaban karin mustaqbalkooda, taas oo ah mid runta kafog islamarkaana si tartiib ah u dhaawacaysa kalsoonidooda

Si loo dhiso kalsoonida dhab ah, waa in aad baratid inaad guuldarooyinka u aragto cashar iyo khibrad. Qof kasta wuu sameeyaa khalad; waxa muhiimka ah waa sida aad uga faa’iideysato.

Tusaale ahaan, haddii aad hore shaqo ku fashilantay, ama xidhiidha nolosha ah uu kaa xumaaday ha u arkin in aad tahay qof liita, laakiin u arag fursad aad ku barato qaab kale oo  cusub oo nolosha ah islamarkaana aadan u samayn in khalad kii hore oo kale.

Xalka:

Xoog saar xaalada maanta aad joogto iyo waxa aad rabto inaad noqoto mustaqbalka dhaw adiga oo shidaal ka dhigaya khibradii Shalay iyo doonista xoogan ee mustaqbalka.

4. Inaadan Aqoonin Erayga “Maya”

Mid ka mid ah arrimaha ugu waa weyn ee hoos u dhigta kalsoonidooda si lamid ah wax soosaarkaaga waa inaadan garaneyn erayga “Maya”. Dadka qaar waxay isku dayaan inay raalli geliyaan qof walba oo ay la kulmaan. Waxay ka baqaan in ay diidaan codsiyada dadka kale, taas oo keenta in ay dareemaan culays iyo daal joogto ah maadaama aysan ku hawlanayn wixii dantooda ahaa

Haddii aad had iyo jeer tiraahdo “HAA” dhammaan codsiyada iyo shuruudaha dadka kale, waxaad luminaysaa xornimadaada iyo awoodda aad u leedahay inaad diirada saarto yoolalkaaga. Tani waxay si toos ah hoos ugu dhigtaa natiijadaada, sababtoo ah waxaad dareemeysaa inaad hawlo badan qabanayso oo aad daalayso, isla markaana aanad maamuli karin noloshaada.

Xalka:

Baro inaad tiraahdo “maya” markay tahay lagama maarmaan. Tani waxay dhistaa xuduudo caafimaad qaba, waxayna kalsooni kuu siisaa inaad diirada saarto waxa adiga muhiimka kuu ah. Waxa kale oo ay kaa caawineysaa inaad dareento in qiimahaaga uu ka imanayo gudahaaga, ee aanay dad kale go’aaminaynin.

Ugu danbayn

Kalsoonidaadu waa hanti qaali ah, laakiin si fudud ayay u dhaawacmi kartaa haddii aadan ka feejignaan arrimahan.

4-taan arrimood waa kuwa sida dhabta ah hoos u dhiga kalsoonidaada, waxsoosaarkaaga, qiimahaaga iyo Natiijooyin kaagaba

isbarbardhigga joogtada ah, jabinta balamaha naftaada, la noolaanshaha guuldarrooyinkii hore, iyo inaadan aqoonin erayga “maya”waa arrimo uu qof walba ka hortagi karo

Hadii aad akhriday qormadaan islamarkaana aad si fiican u dhuuxday hada markaa waa wakhtigii aad bilaabi lahayd dhisida kalsoonida dhabta ah, adigoo diiradda saaraya guulahaaga, ka baranaya casharradii hore ee guuldarrooyinka, ilaalinaya ballamaha naftaada, ugu danabayna baranaya in aad tiraahdo “maya” marka ay qasabka tahay.

W/q Kaderfy