Diirad saarida hal meel waa mid ka mid ah awoodaha ugu qaalisan ee qofku leeyahay, sababtoo ah nolosha casriga ah waxay ina gelisay mashquul badan, farriimo badan, fikrado badan iyo howl badan oo maskaxda kaa daalinaya. Haddii aadan lahayn hal meel oo aad ku wajaho tamartaada, waxaad noqoneysaa qof maalin walba hawl badan qabta, laakiin aan horumar muuqda samaynin.
Maqaalkaan waxaan ku faahfaahin doonaa 3 qodob oo muhiim ah oo kaa caawinaya inaad diirad saarto hal meel, waxaanan isku dayi doonaa inaan si fiican u faahfaahino inaga oo ku salayn doona waaqica aan ku noolnahay maantay.
1. Inaad Aqoonsato Sababta aad u rabto waxa aad qabanayso (WHY)
Qodobka ugu horeeya ee kuu sahlaya inaad diirad saarto hal meel waa inaad fahamto maxaad dhab ahaan u rabtaa noloshaada. Dadka intooda badan waxay ku mashquulaan waxyaabo badan oo kala duwan sababtoo ah ma cada ujeedadooda dhabta ah. Marka ujeedada la waayo, tamarta ayaa kala baahda shaqo kasta ama meel kastana waxay noqonaysaa jihadaada.
Si aad u hesho diirad saarida, waxaad isku daydaa inaad naftaada weydiiso su’aal dhab ah oo muhiim ah, su’aashaas oo ah:
Maxaan rabaa inaan noqdo hada, sanadka danbe, 3 sano gudahood ama mustaqbalka?
Waxaad arki doontaa inaad ka jawaabi karto hal ama laba ujeedo oo keli ah, kuwaas oo dhisi kara mustaqbalkaaga. Marka ujeedada la helo, diiraddu way fududaataa, sababtoo ah maskaxdu waxay joojinaysaa orodka badan ee marba meel u boodka ah iyo firaaqa badan ee midba meel kale u socdo.
Ujeedada cadi waxay maskaxda ka dhigtaa mid degan, waxay kordhisaa xoog-saarista (concentration), waxayna hoos u dhigtaa mashquulka aan faa’iidada lahayn. Qof kasta oo guuleysta wuxuu bilaabaa inuu xaqiijiyo ujeedada cad, taas oo noqota nalka iftiimisa ama hagta dadaalka qofka.
2. Ka fagow Waxyaabaha mashquuliya Maskaxda
Qodobka labaad waa in aad noloshaada ka saarto waxyaabaha kaa lumiyo waqtiga, tamarta iyo feejignaanta. Mashquulka waa cadowga koowaad ee wax soo saarka (productivity) iyo horumar. Dadka intooda badan waxay ku firdhaan ama ku kala baahaan dhowr meel sababtoo ah nololhooda waxaa ku badan waxyaabo buux dhaafiyey maskaxda.
Waxaad is weydiin kartaa:
- Maxaa iga dhiga qof mashquul badan laakiin wax yar qabta
- Maxaan joojin karaa maanta si aan kor ugu qaado diirad saarkayga
- Maxaa wakhtiga ugu badan iga qaata oo aan nolosha ka saari karaa
Waxyaabaha ugu badan ee burburiya diiradda qofka waa:
- Farriimaha badan ee telefoonka
- Social media isticmaal aan kala go’ lahayn
- Hawlo aan muhiim ahayn oo wakhti badan qaata
- Dad badan oo kuu soo jiida meel kasta
Si aad uga adkaato arimahan, samee liis loo yaqaan:
“What Drains Me” – Waxyaabaha aadka ii daaliya
Iyo
“What Energizes Me” – Waxyaabaha i xoojiya tamar ahaan
Markaad fahanto waxa ku daaliya, waxaad awoodi doontaa inaad ka takhalusto, taas oo kor u qaadaysa feejignaantaada (mental clarity), iyo diirad saarkaaga. Natiijada ugu dambeysana waa inaad si fudud u diirada u saari karto hal meel ama hal jiho oo aad rabto nolosha.
3. U dhis noloshaada jadwal adag oo aadan marna jabinin
Qodobka saddexaad waa mid dadka guuleysta ay si gaar ah u adeegsadaan. Ma jiro qof diirad joogto ah yeeshay kaas oo aan lahayn jadwal cad oo maalin walba uu ku hago noloshiisa. Jadwalku waa aaladda ugu awoodda badan ee lagu dhiso discipline, loogu kordhiyo diirad saarka, looguna abuuro degganaan maskaxeed, iyo degganaan nafeed.
Haddii aad rabto inaad hal meel diirada saarto:
- Samee jadwal maalinle ah
- Qor saacadaha waxbarashada, shaqada ama riyadaada aad dhiseyso
- Samee 25 minutes work + 5 minutes break (Pomodoro)
- Ka fogow samaynta hawlo badan isku mar (Multitasking)
Jadwalka joogtada ahi wuxuu joojiyaa firaaqada maskaxda, wuxuuna abuuraa isbedel degdeg ah, wuxuuna kuu sahlayaa inaad ka takhalusto waxyaabaha kale ee kala firdhiya dadaalkaaga. Marka aad maalin walba hal shay ku celceliso, noloshaadu waxay kuu qaabaynaysaa hal jiho oo keli ah, waana halka guushu nolosha ay ka bilaabato.
Gunaanad
Haddii aad rabto inaad diirad saarto hal meel, waxaad u baahan tahay:
- Ujeedo cad oo qeexan islamarkaana aad arki karto
- Maskax ka nadiif ah mashquulka badan ee maskax daaliska ah
- Jadwal adag oo joogto ah oo aanad marna jabinin
Haddii saddexdan aad ku dhaqanto, waxaad awoodi doontaa inaad gaadho heer aad maalin walba ku dareento Diirad saar sax ah, dhiirigalin gudahaaga ah iyo horumar dhab ah.
KA
